Монгол улсын Хөвсгөл аймаг, Солонгос улсын Тэжон хотын Со дүүрэг 2011 онд анх найрамдалт харилцаа тогтоосноос хойш идэвхитэй хамтран ажиллаж байгаа билээ. Хамтын ажиллагаа нь төр захиргаа, эрүүл мэндийн салбарт түлхүү өрнөж ирсэн бөгөөд энэ хүрээнд Хөвсгөл аймгийн Засаг даргын орлогчоор ахлуулсан төлөөлөгчид 2014 оны 12 дугаар сарын 10-13-ны өдрүүдэд Со дүүргийн Засаг даргын урилгаар тус дүүрэгт албан айлчлал хийв. Айлчлалын үеэр Со дүүргийн захиргаа, Иргэдийн төлөөлөгчдийн хурал зэрэг төр захиргааны удирдах байгууллагууд, эрүүл мэнд, боловсрол, нийгмийн хамгаалал, хот байгуулалт болон шинжлэх ухаан технологийн байгууллагуудад зочлон үйл ажиллагаатай нь танилцаж, цаашид хэрхэн хамтран ажиллах, ямар арга хэмжээг хамтран хэрэгжүүлэх боломжтой талаар удирдлагуудтай нь уулзаж ярилцан санал солилцов. Өнгөрсөн жилүүдэд хоёр талын хамтын ажиллагааны хүрээнд жил бүр харилцан төлөөлөгч солилцохын зэрэгцээ төрийн албан хаагчдад зориулсан богино хугацааны сургалт, Со дүүргийн эмч мэргэжилтнүүдийн үзлэг эмчилгээ, сайн дурын үйл ажиллагаа зэрэг бодитой ажлуудыг хэрэгжүүлж ирсэн бөгөөд хамтын ажиллагаагаа цаашид улам бүр өргөжүүлж, Хөвсгөл аймгийн эмч нарыг Со дүүргийн эмнэлэгт мэргэжил дээшлүүлж дадлагажуулах, боловсролын салбарт оюутан, сурагч солилцооны хөтөлбөр гэх мэт ажлуудыг шинээр хэрэгжүүлэх тухай асуудлаар ярилцан ирэх жилээс туршилтын байдлаар эхлүүлж үзэхээр тохиролцлоо.