Холбооны гамшгаас сэргийлэх хорооны хурал 3 сарын 9-ний өдрөөс 12-ны өдрийг хүртэл Япон улсын Хёго мужид болж өнгөрлөө. Гамшгаас сэргийлэх хорооноос Холбооны гишүүн орон нутгуудын гамшгаас сэргийлэх чадварыг бэхжүүлэхэд хувь нэмэр оруулах зорилгоор онол практик хосолсон арга хэмжээг 2002 оноос эхлэн зохиож байна. Энэ жил 1995 оны 1 сарын 17-ны өдөр болсон “Ханшин Аважигийн хүчтэй газар хөдлөлт”-ийн 20 жилийн ой тохиож буйгаар онцлог юм. Хуралд БНХАУ-ын 5, БНСУ-ын 5, Монгол улсын 9 орон нутаг буюу нийт 3 улсын 19 орон нутгаас 32 хүн оролцжээ. Хёго муж газар хөдлөлттэй холбогдох туршлага сургамж ихтэйн хувьд гамшгаас сэргийлэх чиглэлийн төрөл бүрийн үйл ажиллагааг явуулдаг. Энэ удаагийн арга хэмжээний хүрээнд гамшгаас сэргийлэх байгууламжтай танилцах, гамшигийг бодитоор мэдрүүлэх туршилтын газартай танилцах зэрэг хөтөлбөр багтсан. Эхний өдөр зочид төлөөлөгчид “Хүн ба гамшгаас сэргийлэх ирээдүйн төв”-өөр айлчлан газар хөдлөлт болсон тухайн үеийн бичлэгийг үзэхийн зэрэгцээ гамшгаас сэргийлэх болон гамшиг ослын үед авах арга хэмжээ зэрэг Хёго мужийн туршлагаас сурч мэдэж авсан. Дараагийн өдөр нь Хёго мужийн гамшгаас сэргийлэх төв, Кобэгийн боомт дахь Газар хөдлөлтийн дурсгалт парк, Кобэ хотын аюулыг хянах төвөөр айлчилсан. Энэхүү арга хэмжээнд оролцсон зочид төлөөлөгчид Хёго мужийн гамшгаас сэргийлэх тэргүүний бодлого, арга туршлагаас суралцлаа гэж өндөр сэтгэгдэлтэй байв. Сүүлийн үед тус хорооны арга хэмжээнд Монгол улсаас олноор оролцож байна. Ялангуяа энэ удаад оролцогчдийн тэн хагас нь Монголчууд байв. Өнгөрсөн жилийг хүртэл Монголын оролцогчид хурлын материал монгол хэлээр гардаггүй, мөн хурлын үеэр монгол хэлний орчуулагч байхгүй орос хэлээр сонсох зэрэг бэрхшээлтэй тулгардаг байсан бол энэ удаад NEAR Холбооны Хэрэг эрхлэх газраас аман болон бичгийн орчуулгийн дэмжлэг үзүүлэв.