NEAR-ийн Ерөнхий нарийн бичгийн дарга Им Бён Жин 3 сарын 12-ны өдөр Жэжү Лотте зочид буудалд болсон "2025 NEAR Гишүүн орон нутгуудын хурал"-д оролцсон Өвөр Монголын ӨЗО-ы Гадаад хэргийн газрын дэд дарга Ван Шюэжүн тэргүүтэй төлөөлөгчдийг хүлээн авч уулзан, NEAR болон Эрчим хүчний хамтын ажиллагааны хороотой холбоотой асуудлаар санал солилцов.
Ерөнхий нарийн бичгийн дарга Им Бён Жин Өвөр Монголын ӨЗО нь NEAR-ийн эрчим хүчний хамтын ажиллагааны салбарт чухал үүрэг гүйцэтгэж буйг онцлон тэмдэглэж, 2023 оны 7-р сард Өвөр Монголын Ордос хотноо амжилттай болж өнгөрсөн "NEAR Эрчим хүчний хамтын ажиллагааны хорооны анхдугаар хурал"-ыг өндрөөр үнэлэв.
Тэрээр энэ удаагийн хурал нь 6 улсын 46 гишүүн орон нутгийн захиргааны байгууллага болон 7 холбогдох байгууллагын нийт 113 хүн оролцсон хамгийн том хэмжээний арга хэмжээ болж буйг онцлон дурдаж, Өвөр Монголын ӨЗО-ыг цаашид эрчим хүчний хамтын ажиллагааны салбарт илүү идэвхтэй оролцохыг хүсэж буйгаа илэрхийлэв.
Үүний хариуд, Ван Шюэжүн дэд дарга NEAR нь Зүүн хойд Азийн орон нутгийн засаг захиргаадын хооронд олон талт болон хоёр талт хамтын ажиллагаанд чухал үүрэг гүйцэтгэж байгааг үнэлж, Өвөр Монголын ӨЗО-д байнгын дэмжлэг үзүүлж буйд талархал илэрхийлэв.
Мөн цаашид NEAR-ийн олон төрлийн арга хэмжээнд идэвхтэй оролцохоо мэдэгдэж, Эрчим хүчний хамтын ажиллагааны хорооны дараагийн хурлыг илүү амжилттай зохион байгуулахын тулд Өвөр Монголын ӨЗО-ы Гадаад хэргийн газар болон NEAR-ийн Хэрэг эрхлэх газар нягт хамтран ажиллах болно гэдгээ онцлов.