11 сарын 23-ны өдөр NEAR Холбооны Ерөнхий нарийн бичгийн дарга Им Бён Жин Ённам Их Сургуулийн “Глобал авьяас” коллежид уригдан очиж, 100 гаруй оюутанд “Зүүн хойд Азийн улс төрийн өөрчлөлт ба орон нутгуудын хамтын ажиллагаа” сэдвээр тусгай лекц уншив.

Им дарга сүүлийн үеийн дэлхийн болон Зүүн хойд Азийн нөхцөл байдал, Зүүн хойд Азийн бүс нутгийн онцлог (Улс орнуудын хоорондын хамтарсан байгууллага байдаггүй. Үзэл баримтлал, түүх, нутаг дэвсгэр гэх мэт асуудлаас болж маргаан, зөрчилдөөнтэй байдаг бүс нутаг)-ийг танилцуулж, дээрх онцлогоос шалтгаалаад орон нутаг, хувийн хэвшлийн  байгууллага хоорондын харилцаа, хамтын ажиллагаа нэн шаардлагатай бүс нутаг хэмээн тайлбарлав.

NEAR Холбоо нь Зүүн хойд Азийн орон нутгийн засаг захиргааны байгууллагын хамтын ажиллагааны төв байгууллага гэдгийг онцлоод, NEAR Холбоо болон түүний Хэрэг эрхлэх газрын өнөөгийн байдлын талаар дэлгэрэнгүй танилцуулав.

 Мөн түүнчлэн, лекц уншихын өмнө Ённам Их Сургуулийн захирал Чэ Вэ Чүлтэй уулзаж, үдийн зоог барих үеэр NEAR болон Ённам Их Сургууль хооронд NEAR-ын гишүүн орон нутгуудын төрийн албан хаагчдыг сургах, Зүүн хойд Азийн их дээд сургуулиуд хооронд харилцан туршлага солилцох зэрэг хамтын ажиллагааны талаар санал солилцов.