Зүүн Хойд Азийн Нутгийн Захиргаадын Холбоо (NEAR)-ны Ерөнхий нарийн бичгийн дарга Им Бён Жин 3 дугаар сарын 30-ны өдөр БНСУ-д суугаа Мьянмар Улсын Элчин сайдын яаманд зочлон Элчин сайд Мьо Минт Маунгтай уулзалт хийлээ. Тус уулзалт нь Мьянмар Улсын Мандалай, Шан, Янгон мужууд NEAR Холбооны сурвалжлагч гишүүнээр элсэх хүсэлт гаргасантай холбогдуулан зохион байгуулагдсан юм.
Уулзалтын үеэр Ерөнхий нарийн бичгийн дарга Им Бён Жин дээрх гурван мужийн элсэх үйл явц Буриадын Бүгд Найрамдах Улс (NEAR-ийн Тэргүүлэгч улс) болон БНСУ-д суугаа Мьянмар Улсын Элчин сайдын яамны идэвхтэй дэмжлэгийн үр дүнд амжилттай урагшилж буйд талархал илэрхийлэв. Тэрбээр мөн NEAR Холбооны үүсэл хөгжил, гишүүнчлэлийн бүтэц, үндсэн үйл ажиллагаа, сурвалжлагч гишүүний эрх, үүрэг, давуу талуудын талаар дэлгэрэнгүй танилцууллаа.
Түүнчлэн “NEAR нь зөвхөн Зүүн Хойд Азийг төдийгүй Төв Ази болон АСЕАН-ы бүсийг хамарсан орон нутгийн захиргаадын олон талт хамтын ажиллагааны томоохон платформ юм” хэмээн онцолж, бүс нутгийн хамтын хөгжил, энх тайвныг бэхжүүлэхэд Мьянмар зэрэг АСЕАН-ы гишүүн орон нутгийн захиргаад идэвхтэй оролцох боломжийг өргөжүүлэхэд Элчин сайдын яамны зүгээс дэмжлэг үзүүлэхийг хүсэв.
Хариуд нь Элчин сайд Мьо Минт Маунг “NEAR Холбоо нь Зүүн Хойд Азийн орон нутгийн захиргаадын хамтын ажиллагаанд чухал үүрэг гүйцэтгэж ирснийг өндрөөр үнэлж байна” хэмээн тэмдэглээд, тус Холбооны зорьж буй “Зүүн Хойд Азийн хамтын хөгжил цэцэглэлт, энх тайван”-ыг бэхжүүлэх зорилгыг бүрэн дэмжиж буйгаа илэрхийллээ. Мөн NEAR-т элсэх хүсэлт гаргасан гурван мужийг “Мьянмар Улсын нөлөө бүхий бүс нутгууд” хэмээн тодорхойлж, цаашдын хамтын ажиллагаанд өндөр хүлээлттэй байгаагаа дурдав.
Түүнчлэн тэрбээр “Ковид-19 цар тахлын дараа Мьянмар, Солонгос хоёр орны харилцаа тодорхой хэмжээнд суларсан боловч өмнө нь хоёр орны хамтын ажиллагаа идэвхтэй, сайн түвшинд байсан” гэдгийг онцлоод ирэх 4 дүгээр сард шинэ Засгийн газар байгуулагдахтай холбогдуулан NEAR Холбооны хүрээнд орон нутгийн захиргаадын хамтын ажиллагаа өргөжин тэлж, улмаар хоёр улсын харилцааг сэргээхэд чухал түлхэц болно гэдэгт найдаж байгаагаа илэрхийллээ.