Зүүн Хойд Азийн Нутгийн Захиргаадын Холбоо (NEAR)-ны Ерөнхий нарийн бичгийн дарга Им Бён Жин 10-р сарын 28-ны өдөр Сөүл хотноо болсон “БНСУ-БНХАУ-ын захирагч, дэд захирагч нарын 3-р хурал”-д оролцохоор Солонгост айлчилж буй Ляонин мужийн дэд захирагч Шань И тэргүүтэй төлөөлөгчдийг хүлээн авч уулзан, харилцан сонирхсон асуудлуудаар санал солилцов.
Тэрээр Ляонин мужийн төлөөлөгчдийг халуун дотноор угтан авч, сүүлийн хоёр жилийн хугацаанд NEAR Холбооны тэргүүлэгчийн үүргийг гүйцэтгэхдээ Холбооны хөгжилд үнэлж баршгүй хувь нэмэр оруулсан Ляонин мужид талархал илэрхийлэв. Мөн NEAR Холбооны сүүлийн үеийн үйл ажиллагаа, ирээдүйн гол төлөвлөгөөг танилцуулж, цаашид Ляонин муж нь NEAR Холбооны Хэрэг эрхлэх газартай нягт хамтран ажиллаж, зөвхөн мужийн хөгжил төдийгүй Зүүн Хойд Азийн бүс нутгийн хөгжилд манлайлах үүрэг гүйцэтгэнэ гэдэгт найдаж буйгаа илэрхийлэв.
Хариуд нь дэд захирагч Шань И Ляонин мужид хандсан анхаарал, дэмжлэгт талархал илэрхийлээд, “Ляонин муж NEAR платформыг ихээхэн чухалчилж, цаашид ч NEAR-тэй идэвхтэй хамтран ажиллан олон салбарт бодитой хамтын ажиллагааг өрнүүлэх болно” гэж онцлон хэлэв. Мөн ирэх оны 5-р сард зохион байгуулагдах “Ляонин мужийн олон улсын нөхөрсөг хотуудын чуулга уулзалт”-ын үеэр NEAR-ийн “Дижитал эдийн засгийн дэд хороо”-ны хурлыг хамтатган зохион байгуулах төлөвлөгөөг танилцуулж, хоёр арга хэмжээ амжилттай болохын тулд NEAR нарийн бичгийн дарга нарын газрын өндөр түвшний төлөөлөгч, бизнесийн төлөөллийг урин оролцуулах зэрэгт дэмжлэг үзүүлэхийг хүсэв.
Им Ерөнхий нарийн бичгийн дарга үүнд хариу болгон NEAR-ийн боломж, эрх хэмжээний хүрээнд бүх талаар дэмжлэг үзүүлэхээ илэрхийлэв.
Энэхүү уулзалтад Ляонин мужаас Гадаад хэргийн газрын дарга Ло Ли, мөн хэлтсийн дарга Жао Шао Ин нар оролцсон бол NEAR-ийн талаас Олон улсын хамтын ажиллагааны хэлтсийн дарга Чой Жу Хва байлцав.