Зүүн Хойд Азийн Нутгийн Захиргаадын Холбоо (NEAR)-ны Ерөнхий нарийн бичгийн дарга Им Бён Жин нь NEAR-ийн гишүүн орон нутаг болох Шаньси мужаас 9 сарын 27-ны өдөр зохион байгуулсан “2025 Тайюань эрчим хүч ба бага нүүрстөрөгчийн хөгжил форум”-д цахимаар мэндчилгээ дэвшүүлэв.
Тэрээр мэндчилгээндээ “Шаньси муж нь байгальд ээлтэй нүүрс олборлолт болон устөрөгчийн эрчим хүч зэрэг ногоон эрчим хүчний салбарт тэргүүлэгч амжилт гарган, нүүрстөрөгчийн төвийг сахих зорилгод хүрэх болон уур амьсгалын хямралд хариу өгөхөд чухал хувь нэмэр оруулж ирсэн” хэмээн үнэллээ. Мөн “Тайюань эрчим хүч ба бага нүүрстөрөгчийн хөгжил форум нь олон улсын хамтын ажиллагааны талбар болж, дэлхий нийт эрчим хүч хэмнэлт ба нүүрстөрөгчийн ялгарлыг бууруулах зорилтыг хамтдаа хэрэгжүүлэхэд чухал үүрэг гүйцэтгэж байна” хэмээн онцолж, цаашид NEAR Холбооны Хэрэг эрхлэх газар нь Шаньси мужтай нягт хамтран ажиллаж, эрчим хүч, уур амьсгалын өөрчлөлт зэрэг олон салбарт гишүүн засгийн газруудын солилцоо, хамтын ажиллагааг идэвхжүүлэхэд дэмжлэг үзүүлэхээ илэрхийлэв.
Шаньси муж нь БНХАУ-ын гол эрчим хүч, түүхий эдийн баазын хувиар нүүрс, устөрөгчийн эрчим хүч зэрэг ногоон шилжилтэд шаардлагатай шинэ технологийн хөгжлийг тэргүүлж ирсэн. Ялангуяа 2016 оноос хойш NEAR-ийн “Эрчим хүч ба уур амьсгалын өөрчлөлт”-ийн хорооны зохицуулагчаар ажиллаж, гишүүн орон нутгуудын мэдээлэл солилцоо, хамтын хариу арга хэмжээг удирдан зохион байгуулж ирсэн бөгөөд форум, семинаруудыг зохион байгуулах замаар Зүүн Хойд Азийн бүс нутгийн эрчим хүчний хамтын ажиллагааны гүүр болж иржээ.
Нөгөөтэйгүүр, “Тайюань эрчим хүч ба бага нүүрстөрөгчийн хөгжил форум” нь 2016 онд анх байгуулагдсанаас хойш жил бүр зохион байгуулагдаж, ногоон эрчим хүчний шилжилт ба нүүрстөрөгчийн төвийг сахих зорилтыг хэрэгжүүлэхийн төлөө олон улсын нийгэмлэгтэй ололт амжилтаа хуваалцдаг төлөөлөл бүхий хамтын ажиллагааны платформ болсон байна. “Газрын хэвлийн дулаанаар ирээдүйг нээж, бага нүүрстөрөгчөөр хөгжлийг хөтлөх нь” хэмээх уриатай 2025 оны форумын хүрээнд олон улсын бага хурал, мэргэжлийн форум, аж үйлдвэрийн үзэсгэлэн зэрэг өргөн цар хүрээтэй хөтөлбөрүүд зохион байгуулагдлаа.